0:00
/
1ܘܡܒܵܬَܪ ܐܸܫܬܵܐ ܝܵܘܡܵܢܹ̈ܐ: ܠܘܼܒܸܠܹܗ ܝܼܫܘܿܥ ܠܟܹܐܦܵܐ: ܘܠܝܲܥܩܘܿܒ̣: ܘܠܝܘܿܚܲܢܵܢ ܐܵܚܘܿܢܘܼܗܝ: ܘܡܘܼܣܩܵܝܠܹܗ ܠܛܘܼܪܵܐ ܪܵܡܵܐ ܒܢܲܦ̮ܫܵܝܗܝ. 2ܘܦܸܫܠܹܗ ܫܘܼܚܠܸܦܵܐ ܩܵܕَܡܵܝܗܝ: ܘܒܘܼܗَܪܸܢܵܗ̇ ܦܵܬܹܗ ܐܲܝܟܼ ܫܸܡܫܵܐ: ܘܠܒܼܸܫ̈ܬܹܗ ܚܘܸܪܗܘܿܢ ܐܲܝܟܼ ܢܘܼܗܪܵܐ. 3ܘܗܵܐ: ܦܸܫܠܗَܘܿܢ ܚܸܙܝܹܐ ܐܸܠܵܝܗܝ ܡܘܼܫܹܐ ܘܐܹܠܝܼܵܐ ܗܲܡܙܘܼܡܹܐ ܥܲܡܹܗ. 4ܘܓ̰ܘܼܘܸܒܠܹܗ ܟܹܐܦܵܐ ܘܐَܡܝܼܪܹܗ ܠܝܼܫܘܿܥ: ܡܵܪܝܼ: ܨܦܵܝܝܼ ܝ݇ܠܵܗ̇ ܐܸܠܲܢ ܕܠܲܐܟ̣ܵܐ ܗܵܘܵܚ: ܘܐܸܢ ܒܵܣܡܵܐ ܠܘܼܟܼ: ܒܸܬ ܥܵܒ̣ܕܸܢ ܠܲܐܟ̣ܵܐ ܬܠܵܬَ ܡܛܲܠܠܹ̈ܐ: ܚܕܵܐ ܩܵܐ ܕܝܼܘܼܟ: ܘܚܕܵܐ ܩܵܐ ܡܘܼܫܹܐ: ܘܚܕܵܐ ܩܵܐ ܐܹܠܝܼܵܐ. 5ܘܗܵܠܵܐ ܗ̇ܘ ܗܲܡܙܘܼܡܹܐ: ܗܵܐ: ܥܢܵܢܵܐ ܒܲܗܪܵܢܬܵܐ ܥܒܸܕܠܵܗ̇ ܛܸܠܵܢܝܼܬܵܐ ܥܲܠܵܝܗܝ: ܘܗܵܐ: ܩܵܠܵܐ ܡ̣ܢ ܥܢܵܢܵܐ: ܒܹܐܡܵܪܵܐ: ܐܵܗܵܐ ܝܠܹܗ ܒܪܘܿܢܝܼ ܡܘܼܚܸܒܵܐ: ܕܒܝܹܗ ܒܸܒܣܵܡܝܼ ܝ݇ܠܵܗ̇: ܐܸܠܹܗ ܫܡܸܥܡܘܿܢ. 6ܘܟܲܕ ܫܡܸܥܠܗَܘܿܢ ܬܲܠܡܝܼܕܹ̈ܐ: ܢܦܸܠܗܘܿܢ ܥܲܠ ܦܵܬܘܵܬܵܝ̈ܗܝ: ܘܙܕܸܥܠܗܘܿܢ ܪܵܒܵܐ. 7ܘܐَܬܹܐܠܹܗ ܠܟܸܣܠܵܝܗܝ ܝܼܫܘܿܥ: ܘܕܩܸܪܹܗ ܒܝܼܵܝܗܝ ܘܐَܡܝܼܪܹܗ: ܩܘܼܡܘܿܢ: ܠܵܐ ܙܵܕܥܝܼܬܘܿܢ. 8ܘܡܘܼܪܸܡܠܗܘܿܢ ܥܲܝܢܵܝ̈ܗܝ ܘܠܐ݇ܢܵܫܵܐ ܠܵܐ ܚܙܹܐܠܗܘܿܢ ܫܒ̣ܘܿܩ ܡ̣ܢ ܠܝܼܫܘܿܥ ܒܢܲܦ̮ܫܹܗ. 9ܘܟܲܕ ܒܸܨܠܵܝܵܐ ܗ݇ܘܵܘ ܡ̣ܢ ܛܘܼܪܵܐ: ܦܩܝܼܕܵܝܠܹܗ ܝܼܫܘܿܥ ܘܐَܡܝܼܪܹܗ ܐܸܠܵܝܗܝ: ܠܐ݇ܢܵܫܵܐ ܠܵܐ ܐܵܡܪܝܼܬܘܿܢ ܐܵܗܵܐ ܚܸܙܘܵܐ: ܗܲܠ ܕܩܵܝܸܡ ܒܪܘܿܢܹܗ ܕܐ݇ܢܵܫܵܐ ܡ̣ܢ ܡܝܼܬܹ̈ܐ. 10ܘܒܘܼܩܸܪܗܘܿܢ ܡܸܢܹܗ ܬܲܠܡܝܼܕܘܼ̈ܗܝ: ܘܐَܡܸܪܗܘܿܢ ܐܸܠܹܗ: ܒܲܣ ܩܵܡܘܿܕܝܼ ܣܵܦܪܹ̈ܐ ܟܹܐ ܐܵܡܪܝܼ ܘܵܓ̰ܸܒ ܝ݇ܠܵܗ̇ ܕܐܹܠܝܼܵܐ ܐܵܬܹܐ ܩܵܕَܡܵܝܬܵܐ. 11ܓ̰ܘܼܘܸܒܠܹܗ ܘܐَܡܝܼܪܹܗ: ܐܹܠܝܼܵܐ ܗܲܪ ܒܹܐܬܵܝܵܐ ܝܠܹܗ: ܘܟܠ ܡܸܢܕܝܼ ܒܸܬ ܡܲܕܸܪ. 12ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܡܩܵܕَܡ ܐܵܕܝܼܵܐ ܐܹܠܝܼܵܐ ܐܬܝܼܵܐ ܝܠܹܗ: ܘܠܵܐ ܝܕܸܥܠܗܘܿܢ ܐܸܠܹܗ: ܘܥܒܸܕܠܗܘܿܢ ܒܝܹܗ ܟܠ ܡܸܢܕܝܼ ܕܒܣܸܡܠܵܐ ܠܗ݇ܘܿܢ. ܗܲܕܟ̣ܵܐ ܐܘܼܦ ܒܪܘܿܢܹܗ ܕܐ݇ܢܵܫܵܐ ܗܕܝܼܪܵܐ ܝܠܹܗ ܕܩܵܒܸ̇ܠ ܚܲܫܵܐ ܡܸܢܵܝܗܝ. 13ܗ̇ܝܓܵܗ ܦܘܼܪܡܹܠܗܘܿܢ ܬܲܠܡܝܼܕܹ̈ܐ ܕܥܲܠ ܝܘܿܚܲܢܵܢ ܡܲܥ̄ܡܕܵܢܵܐ ܐَܡܝܼܪܹܗ ܐܸܠܵܝܗܝ. 14ܘܟܲܕ ܐ݇ܬܹܐܠܗܘܿܢ ܠܟܸܣ ܟܸܢܫܵܐ: ܐَܬܹܐܠܹܗ ܠܟܸܣܠܹܗ ܚܲܕَ ܐ݇ܢܵܫܵܐ: ܘܒܪܸܟ̇ܠܹܗ ܩܵܕَܡܘܼܗܝ: ܘܐَܡܝܼܪܹܗ ܐܸܠܹܗ. 15ܡܵܪܝܼ: ܪܵܚܸܡ ܥܲܠ ܒܪܘܿܢܝܼ: ܕܐܝܼܠܹܗ ܒܲܪ ܐܸܓܵܪܵܐ ܘܣܸܪܝܵܐ ܡܸܪܥܝܵܐ ܝܠܹܗ: ܣܵܒܵܒ ܪܵܒܵܐ ܓܵܗܹ̈ܐ ܒܢܘܼܪܵܐ ܟܹܐ ܢܵܦܸܠ: ܘܪܵܒܵܐ ܓܵܗܹ̈ܐ ܒܡ̈ܝܼܵܐ. 16ܘܡܘܼܬَܝܹܠܝܼ ܐܸܠܹܗ ܠܟܸܣ ܬܲܠܡܝܼܕܘܼ̈ܟ: ܘܠܵܐ ܡܨܹܐܠܗܘܿܢ ܠܒܵܣܘܿܡܹܗ. 17ܓ̰ܘܼܘܸܒܠܹܗ ܝܼܫܘܿܥ ܘܐَܡܝܼܪܹܗ: ܝܵܐ ܐܘܼܓ̰ܵܓ̣ ܠܵܐ ܗܘܼܡܸܢܬܵܐ ܘܦܟ̰ܝܼܠܬܵܐ: ܗܲܠ ܐܝܼܡܲܢ ܒܸܬ ܗܵܘܸܢ ܠܟܸܣܠܵܘܟ̣ܘܿܢ: ܘܗܲܠ ܐܝܼܡܲܢ ܒܸܬ ܩܵܒ̇ܠܸܢܵܘܟ̣ܘܿܢ: ܡܲܝܬَܝܼ ܠܹܗ ܠܟܸܣܠܝܼ ܠܲܐܟ̣ܵܐ. 18ܘܢܓ̰ܘܼܠܹܗ ܒܝܹܗ ܝܼܫܘܿܥ: ܘܦܠܸܛܠܹܗ ܡܸܢܹܗ ܕܲܝܘܵܐ: ܘܒܣܸܡܠܹܗ ܝܵܠܵܕَܐ ܡܗ̇ܝ ܣܵܥܲܬ. 19ܗ̇ܝܓܵܗ ܐ݇ܬܹܐܠܗܘܿܢ ܬܲܠܡܝܼܕܹ̈ܐ ܠܟܸܣ ܝܼܫܘܿܥ ܒܢܲܦ̮ܫܹܗ ܘܐَܡܸܪܗܘܿܢ ܐܸܠܹܗ: ܩܵܡܘܿܕܝܼ ܐܲܚܢܲܢ ܠܵܐ ܡܨܹܐܠܲܢ ܠܦܵܠܘܿܛܹܗ. 20ܐܵܡܸܪ ܐܸܠܵܝܗܝ: ܒܘܼܬ ܠܵܐ ܗܲܝܡܵܢܘܼܬܵܟ̣ܘܿܢ. ܣܵܒܵܒ ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܐܸܢ ܗܵܘܝܵܐ ܠܵܘܟ̣ܘܿܢ ܗܲܝܡܵܢܘܼܬܵܐ ܐܲܝܟܼ ܕܲܢܕܸܟܬܵܐ ܕܚܲܪܕܵܠ: ܒܸܬ ܐܵܡܪܝܼܬܘܿܢ ܠܐܵܗܵܐ ܛܘܼܪܵܐ: ܫܵܢܝܼ ܡܐܲܟ̣ܵܐ ܠܬܵܡܵܐ: ܘܒܸܬ ܫܵܢܹܐ: ܘܡܸܢܕܝܼ ܠܹܐ ܗܵܘܝܵܐ ܥܸܨܝܵܐ ܐܸܠܵܘܟ̣ܘܿܢ. 21ܐܝܼܢܵܐ ܐܵܗܵܐ ܬܵܗܵܪ ܠܹܐ ܦܵܠܸܛ ܫܒ̣ܘܿܩ ܡ̣ܢ ܒܨܵܘܡܵܐ ܘܒܨܠܘܿܬܵܐ. 22ܘܟܲܕ ܫܸܪܝܹܐ ܗ݇ܘܵܘ ܒܓܠܝܼܠܵܐ: ܐَܡܝܼܪܹܗ ܐܸܠܵܝܗܝ ܝܼܫܘܿܥ: ܗܕܝܼܪܵܐ ܝܠܹܗ ܒܪܘܿܢܹܗ ܕܐ݇ܢܵܫܵܐ ܕܦܵܐܹܫ ܣܘܼܦܝܵܐ ܒܐܝܼܕܵܬܹ̈ܐ ܕܒܢܲܝ̈ܢܵܫܵܐ. 23ܘܒܸܬ ܩܵܛܠܝܼܠܹܗ: ܘܒܝܵܘܡܵܐ ܕܬܠܵܬَܐ ܒܸܬ ܦܵܐܹܫ ܡܘܼܩܸܡܵܐ. ܘܦܫܸܡܠܗܘܿܢ ܪܵܒܵܐ. 24ܘܟܲܕ ܐ݇ܬܹܐܠܗܘܿܢ ܠܟܦܲܪܢܵܚܘܿܡ: ܐ݇ܬܹܐܠܗܘܿܢ ܐܵܢܝܼ ܕܫܵܩܠܝܼ ܗ݇ܘܵܘ ܬܪܹܝ ܬܪܹܝ ܙܘܼܙܹ̈ܐ ܕܚܲܪܓ̰ ܕܪܹܫܵܐ ܠܟܸܣ ܟܹܐܦܵܐ: ܘܐَܡܸܪܗܘܿܢ ܐܸܠܹܗ: ܪܵܒܝܼܵܘܟ̣ܘܿܢ ܠܹܐ ܝܵܗَܒܸܠ ܬܪܹܝ ܙܘܼܙܹ̈ܐ. 25ܐܵܡܸܪ ܐܸܠܵܝܗܝ: ܗܹܐ. ܘܟܲܕ ܥܒܼܸܪܹܗ ܠܒܲܝܬܵܐ: ܡܩܵܕَܡ ܕܗ̇ܘ ܐَܡܝܼܪܹܗ ܐܸܠܹܗ ܝܼܫܘܿܥ: ܡܘܼܕܝܼ ܒܸܚܫܵܒ̣ܵܐ ܝܘܸܬ: ܫܸܡܥܘܿܢ: ܡܲܠܟܹ̈ܐ ܕܐܲܪܥܵܐ ܡ̣ܢ ܡܵܢܝܼ ܟܹܐ ܫܵܩܠܝܼ ܕܲܡܓ̣ܵܐ ܘܚܲܪܓ̰ ܕܪܹܫܵܐ: ܡ̣ܢ ܒܢܘܿܢܵܝ̈ܗܝ: ܝܲܢ ܡ̣ܢ ܢܘܼܟ̣ܪ̈ܵܝܹܐ. 26ܐܵܡܸܪ ܐܸܠܹܗ ܟܹܐܦܵܐ: ܡ̣ܢ ܢܘܼܟ̣ܪ̈ܵܝܹܐ. ܐܵܡܸܪ ܐܸܠܹܗ ܝܼܫܘܿܥ: ܒܲܣ ܒܢܘܿܢܹ̈ܐ ܐܵܙܵܕܹ̈ܐ ܝܢܵܐ. 27ܐܝܼܢܵܐ ܕܠܵܐ ܡܲܟܦܸܪܵܚ ܠܗ݇ܘܿܢ: ܙܹܠَܐ ܠܝܵܡܵܐ: ܘܕܪܝܼ ܟ̰ܲܢܓܵܠ: ܘܢܘܼܢܵܐ ܩܵܕَܡܵܝܵܐ ܕܐܵܣܸܩ ܫܩܘܿܠ: ܘܦܬܘܿܚ ܦܘܼܡܹܗ ܘܒܸܬ ܡܵܫَܟ̰ܚܸܬ ܙܘܼܙܵܐ. ܠܗ̇ܘ ܫܩܘܿܠ ܘܗܲܒَܠ ܡ̣ܢ ܓܹܒܝܼ ܘܡ̣ܢ ܓܹܒܘܼܟ.